...mer konns jo donn

4,50 Stern(e) 2 Bewertungen

Balu

Mitglied
"Wääschd, ich guck halt immer uff die Sonderahngeboode", hott de Herbert letschd im Subbermargd gemäänt "mer spart jo doch en Haufe Geld. Unn wann was emol net so guhd schmecke unn net so lang halde duhd, wie die deiere Sache, donn wars net so schlimm, donn werds halt fordgeworfe". Er hott e paar Hose in soin Oikaufswage gelegt, die garantiert e Nummer zu klää fer soin Bauch warn.
Ich hann so en Stabel Unnerhose in die Hand genumme. Zeh Stick, fer neunneununneunzich. Do kännt mer sich die Wäscherei faschd spare, unn die dinger fordschmeiße, wonn mer se getrah hot.

De Herbert war inzwische bei de Lebensmiddel unn hot e großi Kischd Äppel aus Neuseeland in de Wage gehobe. Acht Kilo fer zwee Persone. " Des is billicher, wie wann mer bei de Obschdbauer fahre duhd", hotter gesahd unn noch e Kerbsche mit fünf Kilo Birne dezu gepackt. "Wääschd, mer muss uff die Ahngeboode gucke, wann do moler e paar Äppel odder Birne faul werre duhn, wern se fordgeschmisse. Die do hin wolln jo aach lebe unn Umsatz mache".

Ich hann schunn e gonz schlechtes Gewisse gehatt, mit moine zweemol zweehunnert Gramm Gouda
unn dem halbe Kilo Kiwi in moim Wage.

An de Woiregale hotter die Hand noch zeh Flasche afrikanische Rotwoi ausgestreckt.
"Herbert!", hann ich zornich gerufe "des konnschd abber jetzt net bringe als Pälzer!"

"Wieso net ? Die zeh Flasche koschden soviel, wie doi zweeh Fläschel Pälzer Grauburgunder."

"Trinken ihr soviel Woi, Herbert ?"

"Nää", hotter gemäänt "moi Freundin trinkt als emol e Gläsel. Ich trink libber e kaldes Bier. Mir kriehn abber Besuch, unn wann dene der Woi net schmekt, konn mern jo immer noch fordschitte.
Wääschd, mer muss uff die Ahngeboode gucke, dann konn mer aach ruhich mol was falsches oipacke, es war jo billich. Unn es duhd dann net so weh, wann mers fordschmeiße muss."

"Stimmt!" iss mers do oigefalle "duh hoschd jo e neier Schatz. Unn?? Wie schmeckt des Frischverliebtsoi?"

"Wääschd, mer muss...."

"Herbert!! hann ich schnell gerufe "do vorne gebts Haarschampoo! Fünf Flasche fer dreidreiundreißich!"
 

arle

Mitglied
Goldisch....

Und da sagt man immer, nur die Saarländer wären so, wenn sie am Wochenende zum Cora no Saargeminn fahre. Oder umgekehrt, die Wackesse* zum Aldi no Kläänblidderschdorf.

Herrlich pragmatischer kleiner Text, der mir viel Freude gemacht hat.

Bloß net fortschmeiße!

Herzlich

Silvia

Für Nicht-Eingeweihte: *Wackes = Lothringer (c;
 



 
Oben Unten