Laible ond Frisch

Walther

Mitglied
Laitla, so hoißd dees dr Sonndag werdichs, henndrs in derra Zeidong då glesa? Dr Laible on Frisch soll’s nemme gäbba. Dr Blitz sodd drenn neifahra in dees SWR-MFG Glombadsch, dees verreggde, däd då dr Laible jetz saga.

Zarschda hend se dem Scheiffele Frieder us Dattanga/Arms, so said mr zu Dettingen an dr Erms bei ons dåhoba, d’Zong jesasmäßig wässrich gmachd, dass’r faschd druff romdabbad ischd. Uff oimal hend se jetz us däm SWR vrlauda lassa, dass nix isch mid dem sella Äbbes, dees was se ihm vrschbrocha hend, offiziell in dr Zeidong ond end Hand nei. Woischd, so räachd schwäbisch hald, vrschdåsch, a Ehr uff a Ehr. Abr, sell isch es, dr Nellesen, dr Brogrammdireggdor, dees ischd äba koin Schwåb, sellr ischd an andrer, so vo ierbrall her on sonschd ao nix grads.

So. Jetz hämmr dr Salad. Onsr schwäbisch Seriele isch iebrnachd a Miseriele worda.

Bevor mr zom Pongd kommat, mieass mr leidr a wengele end‘ Hischdorie abschwoifa. Vor a baar Jåhr håds a großa Koalizioo z’Schduargard gee, ond die Raode hend, wia jetz ao, an Subbrminischdr geehd. Blondgschdrähnd isch dr gwäa, Schböri haddr ghoißa. An scheenr Må, håd mei Weib gsaigt, middr grada Gosch. S’Deifele war em Schdaadsminischderiom. On weil a jedr d’Wirdschaffd håd fördra wella, håd mr denne zwoi, wia mr dees ao bei de Jonge machd, jedam a Wirdschaffdsfördrorganisaziönle gäba.

Oine von denna zwoi håd dr Exbort ondrschdidzd. Dees isch d’BWI, dia gheerd jetz dem kloina Nils, onsrm Subbrminischdr, der bloos halbdags schaffd, weil’r so subbr isch. Er wird abr oinawäg voll zahld, weil’r jå Dobblsubbrminischdr ischd. Dui andra, dees isch’d MFG, dui ischd fir d’Kuldur, Datavrarbeidong ond Kunschd då. Dr Cheffe von dem Haufa hoißd ao Haasis, håd abr nix mit dem Schbarkassahäsle z’Bärlien zom doa. Dia MFG ghert zom Kretschmann, dem Minischdrbräsidenta.

So håd a jedr sei Schbielzeig kriagd, mit dem’r brachdiera kå. Ond jetz kommd’s. Wann’d a Geld willsch, nå hoggad en dem MFG-Gremiom dia Tibba vom SWR rom, dia sich nå d’Kohle en’d oigena Dasch nei beschließad. Wa hoißd, dass dr Fonk sich selbr brämiera duad. Obwohl emmr glar gwesa isch, dass dees Geld em Ländle ausgeba werda muaß, fließd dees hald jetz noch Mincha, Bärlien on zu den Rheiländr nåch Köln.

On jetz wissa mr, warom dr Scheiffele vo Dettenga nemme weidrmacha derf. Der sidzd em Ländle, on wenn där erfolgreich werda sodd, nå kamr d’Schdeiergröschla ussm Ländle nemme in dem SWR seine Broduggzionsgschäfdla em Nichtschwäbischen Ausland vrsengga. Henndrs?

Also mir doba senn jetz saumäßig narred, ond zwar so narred, da mr bereids schwäbische Kardädsche mached. In sorer Ladong send Walchodrbeera, Schafsbäbbel ond onsre Alblensa denna. On dees Deng schuißr mr Eich om d’Ohra. Mid onsre Albbiffl iebe mr schao dr Eisatz. Wemir mid denna ens Neggrdal rakommad, no wird dees Schduargard zomma schwäbische Bomblona, dadrmid dees abr ganz glar isch.

Kretschmann, mir wällad onser Laible on Frisch wiedr han. On wa wit Du? Im Ernschd: Mach äbbes, on dees schnell!
 



 
Oben Unten