a Frau der ma nix dagegn redn kann

4,40 Stern(e) 5 Bewertungen

huwawa

Mitglied
A Frau, der ma nix
dagegn redn kann

I kenn a Frau, der ma oafach nix dagegn redn kann!
Wann i in da Früah in d` Oarbat geh, und sie siacht mi, dann sagts:
"Gu` Morgn, gemma scho in d` Oarbat?"
"Ja, ja," sag i und "Gu` Morgn!"
Wann i amal an Tag dahoam bi und mir kemman zsaumm,
dann sagts: "Grüass Ihna, san ma heut leicht dahoam?"
I sag a: "Grüass Ihna, ja, ja, heut bin i dahoam!"
Und wann i in an G`schäft a weng was einkaf und mir treffm uns zuafälli,
dann fragts mi a glei: "Ta ma a weng was einkafm heut?"
"Ja, sag i, ja, heut kaf i a weng was ein!
Wann i mitn Hund a Rundn spaziern geh und sie begegnt ma dabei,
dann grüassts mi scho va da Weitn und fragt:
"Geh ma a bisserl mitn Hund spaziern?"
I grüass` a und sag: "Ja, ja, i geh a bisserl mitn Hund spaziern!"

Unlängst hats amoil zan Regna angfangt, wiar i grad wieder mitn Hund unterwegs gwen bin, a richtiger Schlederer is owakemma und i han koan Schirm dabei g`hat. `s Wasser is ma va de Hoar übers Gsicht und ins Gnack owegrunna, bis af d` Haut naß bin i scho gwen, da is` ma a wieder entgegn kemma, sie hat an Regnschirm aufgspannt g`hat und ganz freundli gmoant:
"Grüass Ihna, Herr Nachbar, gell heut regnts!"

"Grüass Ihna", han i a g`sagt, "ja, ja, heut regnts",
weil - was hätt i denn a sunst sagn solln -
sie is halt a Frau, der ma oafach nix dagegn redn kann!
 

Nachtigall

Mitglied
Eine treffende Lebenssituation trefflich gebracht. Die Mundart unterstützt und liefert fast ein Bild von der Frau.
Ich sehe sie in Kleiderschürze, etwas rundlich mit Dauerwelle :)

Schmunzelnde Grüße (auch ohne Wiederspruch)

Alma Marie
 
M

Minotaurus

Gast
Fia an "mundfaula" Muiviertla oda Waidla is dös eh scha ganz schä fui, wos do so g´schmatzt wiad.
Reschpekt!
 



 
Oben Unten